Plantun de Prouvènço

Pèr coumpara dos planto d'encò nostre

Schoenoplectus mucronatus & Picea abies

Schoenoplectus mucronatus

Cyperaceae

Noms en français : Scirpe à écailles mucronées, Souchet mucroné.

Descripcioun :
Lou triangle-bencu s'atrovo quàsi pas au nostre aleva dins li risiero de Camargo ounte n'i'a à bóudre. Se recounèis à sa cambo en triangle, sis espigo groupado e subretout sa bratèio que souvènt part sus li coustat. I'a quàsi pas de fueio, soulamen la guèno (fotò) .

Usanço :
Aquéu triange nous èi bessai vengu emé lou ris qu'èi pas segur que restavo au nostre à passa tèms. Couneissèn pas d'usanço particuliero pèr aquelo planto. Escriéure au site se n'en sabès mai .

Port : Erbo
Taio : 30 à 80 cm
Fueio : costo paralèlo
Tipe bioulougico : Eloufite
Cicle bioulougico : Planto renadivo

Gènre : Schoenoplectus
Famiho : Cyperaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 1,5 à 2,5 cm
Flourido : Estiéu

Sòu : Ca
Autour basso e auto : 0 à 400 m
Aparado : Noun
Juilet à setèmbre

Liò : Risiero - Estang
Estànci : Termoumediterran à Mesoumediterran
Couroulougi : Cousmoupoulito
Ref. sc. : Schoenoplectus mucronatus (L.) Palla, 1888 (= Scirpus lacustris L., 1753 )

Serento

Picea abies

Pinaceae

Àutri noum : Serénta, Sarento, Sourento, Serinte, Sùfi.

Noms en français : Epicéa, Épicéa commun.

Descripcioun :
Pèr pas s'engana emé lou sapin fau regarda coume soun lis aguio o peréu li pigno (o vacheto). Li fueio de la serento soun estacado tout à l'entour de la ramo coume uno brosso, au contro de li dóu sap que soun tóuti dins lou meme plan coume un penche. De nouta pamens qu'acò marcho pas pèr d'ùni sap fourestié (coume Abies pinsapo). Li pigno pendoulon, alor qu'encò dóu sap, quouro li poudès vèire, se tènon bèn drecho.

Usanço :
I'a touto meno d'utilisacioun dóu bos segound sa qualita. La pegoulo (resino) èi di proun vulneràri. Foundudo, servié, à passa tèms, pèr sougna li tigno (J.-R. Fortoul). Li jóuini fueio soun manjadisso (ensalado, pèis), an lou goust de citroun.